Бишкекте жаңы Травматология жана ортопедия илимий изилдөө борборунун курулушу уланууда. Учурда имараттын ички жасалгалоо иштери менен катар сырткы дубалдары да капталууда.
Жаңы оорукананын өзгөчөлүгү — сегизинчи кабатындагы тик учак конуучу аянтча. Ал санитардык авиация аркылуу жеткирилген бейтаптарды тез кабыл алып, аларды лифт аркылуу түз эле операциялык бөлүмдөргө жеткирүүгө мүмкүнчүлүк берет.
Жалпы аянты 35 миң чарчы метрге жакын болгон медициналык борбор 5 блоктон жана 8 кабаттан турат. Анда 235 палата, 12 лифт жана жер төлөдө унаа токтотуучу жай болот.
Ошондой эле ооруканада автоматташтырылган кычкылтек системасы орнотулат. Учурда желдетүү, сантехника, электр жана өрткө каршы системалар тартылууда.
Медициналык борборду жыл аягына чейин толук пайдаланууга берүү пландалууда.
