Курулуш, архитектура жана турак жай-коммуналдык чарба министри Нурдан Орунтаев «Ачык кабинет жоопкерчилик аймагы» долбоорунун алкагында Кыргызстандагы жер титирөөгө туруктуу тетиктерди чыгаруучу алгачкы заводдун курулушу менен таанышты.
Министрдин айтымында, жаңы ишкана имараттардын жана курулмалардын сейсмикалык туруктуулугун жогорулатууга багытталган заманбап тетиктерди чыгарат.
Завод Бишкек шаарындагы Чокон Валиханов 2 көчөсүндө жайгашып, жалпы аянты 6 222 чарчы метрди түзөт. Ал министрликке караштуу Мамлекеттик сейсмотуруктуу курулуш жана инженердик долбоорлоо институтунун аймагында курулууда.
Белгиленгендей, долбоор курулуш тармагына жаңы технологияларды киргизүүгө, импортко көз карандылыкты азайтууга жана өлкөдөгү объектилердин сейсмикалык коопсуздугун жогорулатууга өбөлгө түзөт.
