Суу ресурстары, айыл чарба жана кайра иштетүү өнөр жайы министрлиги Бишкек шаарында эттин баасын турукташтыруу жана азык-түлүк коопсуздугун камсыз кылуу максатында ири долбоорду ишке ашыра баштады.
Министрликтин маалыматына ылайык, долбоордун алкагында Чүй облусунда ири көлөмдөгү бодо мал бордоп семиртүүчү чарбалар уюштурулат.
Баштапкы этапта 2 миң 500 баш бодо мал бордоого коюлат. Ал эми жакынкы эки жыл ичинде бул көрсөткүч этап-этабы менен көбөйтүлүп, бордоп семиртилүүчү малдын саны 20 миң башка жеткирилет.
Ведомство белгилегендей, долбоор министрликтин өз каражатынын эсебинен каржыланат.
Министрликтин маалыматына караганда, бул демилге ички рынокту эт менен туруктуу камсыздоого, жаңы жумуш орундарын түзүүгө жана өлкөнүн агроөнөр жай комплексин өнүктүрүүгө өбөлгө түзөт.
