Президент Садыр Жапаров чет өлкөлүк каттоо белгилери бар унааларды легалдаштырууну аяктоо жана алардын жүгүртүүсүн жөнгө салуу тууралуу Жарлыкка кол койду.
Жарлыкка ылайык, легалдаштыруу жол-жобосунан өтпөгөн унаалардын ээлерине 2026-жылдын 1-сентябрына чейин төмөнкү мүмкүнчүлүктөр берилет:
▪️ Унааны акыркы жолу легалдаштыруу;
▪️ Өлкө аймагынан чыгарып кетүү;
▪️ Запастык бөлүктөргө сатуу;
▪️ Утилдештирүү.
Легалдаштыруунун кошумча тартиби 2024-жылдын 31-декабрына чейин Кыргызстанга киргизилген жана каттоодон өтпөгөн унааларга гана тиешелүү болот.
1-сентябрдан кийин легалдаштырылбаган унааларды өлкө аймагында пайдаланууга тыюу салынат. Талаптарды аткарбаган транспорт каражаттары соттун чечими менен атайын токтотуу жайларына коюлуп, кийин утилдештирилиши мүмкүн.
Ошондой эле мындай унааларды атайын токтотуу жайларында сактоо үчүн жеңилдетилген тариф — суткасына 50 сом өлчөмүндө белгиленет.
