Токио Олимпиадасында аялдар күрөшүнөн күмүш медалдын жеңүүчүсү Айсулуу Тыныбекова, узак убакытка созулган тыныгуудан кийин, бүгүн, 4-август фейсбук баракчасы аркылуу кыргыз элине кайрылуу жазды.
Эске салсак, ал фейсбук баракчасына соңку ирет 16-мартта «Олимпиадага даярдык күчөп жаткандыктан, социалдык баракчаларды караганга убаатым жок, сиздерден келген каттарга жооп бере албай калсам, кечирип коюңуздар«,- деп жазган.
Айсулуунун билдирүүсү өзгөртүүсүз берилди.
Кадырлуу кыргыз элим!
Ушул күнгө чейин мени колдоп, демиме дем кошкон ар бириңиздердин каалоо-тилектериңиздерге ийилип таазим кылам!
Азыр ичимде эмоциялар кайнап, чынын айтсам ыйлагым келип турат…
Спорт мени мындай учурларда күчтүү болууга үйрөттү. Такшалдык!
Айта турчу сөз көп. Дагы кенен пикир алмашабыз.
Азыр болсо өлкө намысын кийинки беттештерде коргой турчу спортчуларыбызга ийгилик каалайм! Кыргыз элимдин алтынга болгон үмүтү үчүн күрөшүңүздөр! Алга!
Баары жакшы! Сиздердин колдооңуздар мени дагы да чыйралтат!
