Жалал-Абад шаарындагы Спутник кичи шаарчасындагы таштанды таштоочу жайда жаңы төрөлгөн ымыркай кыз табылган. Бул тууралуу 7-каналга Жалал-Абад ОИИБ маалымат берди.
Бул факты маалыматтардын электрондук журналына катталып, териштирүү иштери башталган. Милиция окуя болгон жерге барып, тиешелүү матералдар чогултулган. Териштирүү учурунда ымыркайдын апасы батирде убактылуу жашап жаткан. Ал Базар-Коргон районунун Акман айыл аймагынын 2005-жылкы тургуну экендиги аныкталган.
18-ноябрь күнү саат 07:30 чамаларда убактылуу жашаган батиринде төрөгөн. Төрөгөн кызын кийимге ороп, таштанды таштоочу жайга таштап койгон. Үшүп, тоңуп калган ымыркайды таап алган жаран менен милициянын аймактык ыйгарымдуу өкүлү төрөт үйүнө алып барышкан.
Наристенин абалы орточо. Учурда текшерүү иштери уланууда.
