Муниципалдык инспекция Шүкүров көчөсүндө муниципалдык аймакка чыгып кеткен капиталдык тосмолорду жана жеңил курулуш объектилерин тазалоону улантууда. Анда Жогорку Кеңештин депутаты Элмурза Сатыбалдиевдин үйүнүн көчөгө чыгып кеткен тосмосу дагы бузулду.
Депутаттын үйү Шүкүров көчөсү, 166 дарегинде жайгашканын Элмурза Сатыбалдиев Жогорку Кеңештин тармактык комитетинин жыйынында билдирген.
«Учурда жолду реконструкциялоо иштери аяктап, асфальт төшөлдү. Бирок тротуарларды куруу үчүн муниципалдык аймакка кирип, курулушка тоскоол болгон тосмолорду бузуу зарыл. Бүгүнкү күндө инспекция тарабынан 61 объект (тосмо, дарбаза, тосмолор, бастырмалар, гараждар) бузулду. 29-сентябрда инспекция №166- үйдүн капиталдык тосмосун түрттүрдү. 10 тосмо калды. Муниципалдык инспекция объектилердин ээлерине каршы сотко доо арыз менен кайрылган»,- дешти мэриядан.