Жогорку Кеңештин бүгүнкү жыйынында депутат Элдар Абакиров Улуттук банктын директорлор кеңешинин мүчөлөрү өздөрүнө бир айда 1 млн сомдон ашык жаздырып алганын билдирди.
Абакиров мындай маалымат шайлоочулардан келгенин, ал маалымат агенттиктеринде жана Улуттук банктын өткөн жыл боюнча берген отчетунда дагы жазылганын айтты.
“2023-жылы 7 адамдын жалпы бонусубу, 84 млн сомдон ашыптыр. Мындай айтканда, киши башына айына 1 млн сомдон ашык. Албетте, профессионалдар жакшы айлык алыш керек. Бирок айына 1 млн сом мугалимдин айлыгынан 40 эсе көп болуп жатат. Бул 2023-жылы эле болуптур, мурунку жылдары мындай, 3-4 эсе аз болуптур”, — деди депутат.
