Бишкектеги караоке-клубда эркек киши тарабынан зомбулукка кабылган жабырлануучу кыз эс алуучу жайдын кызматкерлеринин үстүнөн арыз жазды. Бул тууралуу Октябрь райондук ички иштер башкармалыгынын басма сөз кызматы билдирди.
Маалыматка ылайык, учурда милиция кызматкерлери шектүүнүн жүргөн жерин тактоодо.
«Социалдык тармакта тарап кеткен видеодогу жабырлануучу Д.А.нын жолдошу тасма жарыяланган күндөн тартып үйүнө бара элек. Ошондой эле, милиция кызматкерлери Д.А.ны коргоого алышкан. Ал Октябрь райондук ички иштер башкармалыгына караокенин жумушчуларына карата тиешелүү чараларды көрүү өтүнүчү менен арыз жазды. Бул факты КР Кылмыш -жаза кодексинин «Жеке жашоонун купуялуулугун бузуу» беренеси боюнча Кылмыштардын жана жоруктардын бирдиктүү реестрине катталган», — деп айтылат ИИМдин маалыматында.
Эске сала кетсек, администратор милицияга кабар бермекчи болгондо, жабырлануучу аял өзү каршылык көрсөтүп, урган эркек анын жолдошу экендигин, өз ара чырлаша кеткендигин айткан. Соңунда жубайлар ал жерден чогуу чыгып кетишкен.
Ошондой болсо да, Октябрь РИИБи жогорудагы факт боюнча «бейбаштык» беренеси менен иш козгоп, сотко чейинки өндүрүш ишин баштаган.
