“Төрага “75тин катын” Жогорку Кеңеште ачык-айкын түшүндүрүп берди, алар албетте мыйзам алдында жооп беришет. Ал эми абийир сотун кандай кылабыз?”, — деп суроо калтырган Эмилбек Каптагаев фейсбук баракчасында.
“Мени ойлонтуп, толгонтуп, күнү-түнү кыжалат кылган маселе — бул Жогорку Кеңештин Төрагасы Марлен Маматалиевдин «75 тин каты» дегендин Жогорку Кеңешке кандайча келип, кандай кыймыл-аракеттер болгонун ачыктап айтып бергени болду…
Төрага көп нерсенин башын ачып, маселенин көп жагын айкындап коюптур. Анын айтканына ишенсек ошол «кайрылууну» даярдап, ошончо кишиге кол койдурууну уюштургандар АДАМКЕРЧИЛИККЕ ЖАТПАГАН жолго барышып, өздөрүнүн жашыруун, купуя пландарын ишке ашыруу үчүн канчалаган адамдардын (алардын арасында эл үчүн, мамлекет үчүн опол-тоодой кызмат өтөгөн инсандар дагы бар) кадырына доо кетиришкен, алардын өздөрүнө айтпай туруп сыртынан тон бычып өз кызыкчылыктарына бетсиздик менен пайдаланышкан турбайбы.
«Мамлекеттик төңкөрүш» даярдоо дегени далилденсе уюштуруучулар албетте МЫЙЗАМ алдында жоопко тартылат, жазасын алышат. Ал эми АБИЙИР СОТУН кандай кылабыз?
Мени түйшөлткөн суроо ушул болуп турат…”, — деп жазат ал.
