Кара-Балта шаарында Япониянын «Фукуока» технологиясын колдонуу менен заманбап таштанды полигонун куруу боюнча пилоттук долбоорду ишке ашыруу пландалууда.Бул тууралуу Жаратылыш ресурстары, экология жана техникалык көзөмөл министрлигинен билдирди.
Маалым болгондой, долбоор экологиялык жүктөмдү кескин азайтууга жана таштандыларды башкаруунун заманбап стандарттарына өтүүгө багытталган.
Бүгүн Азия өнүктүрүү банкынын жана Япон фондунун өкүлдөрү менен болгон жумушчу жолугушууда долбоорду ишке ашыруу маселелери талкууланды. Анын ичинде «Фукуока» технологиясын киргизүү, гранттык каржылоону тартуу жана техникалык колдоо көрсөтүү каралды. Аталган технология таштандылардын табигый ажыроо процессин тездетип, уулуу фильтраттардын пайда болушун азайтат жана курчап турган чөйрөгө зыяндуу заттардын бөлүнүп чыгышын алдын алат. Салттуу полигондордон айырмаланып, ал өзүнөн-өзү өрттөнүү коркунучун минималдаштырат жана жагымсыз жыттардын жайылышын кыйла азайтат.
