Кара-Сууда ишкерлик кылган адам катары өзүн тааныштырып, жарандардын малдарын алып, акчасын бербей жүргөн жаран кармалды. Бул тууралуу Ош ОИИБдин басма сөз кызматы билдирди.
Маалыматка ылайык, 9-май күнү Кара-Суу районунун Ички иштер бөлүмүнө Кара-Суу районунун жашоочулары арыз менен кайрылып, анда 2022-жылдын март, апрель айларында “А” аттуу жаран мал союп этин сатып ишкерлик кылган адам катары өзүн тааныштырып, арыздануучулардын малдарын алып, акчасын кийин берүүгө убада кылып, бирок ушул күнгө чейин акчаларын бербей жүргөнүн билдирген.
Бул фактылар кылмыштардын бирдиктүү реестрине Кылмыш-жаза кодексинин 209-беренеси (Алдамчылык) боюнча катталып, кылмыш иштери козголуп тергөө амалдары башталган.
Жүргүзүлгөн ыкчам иш-амалдарынын натыйжасында жогорудагы кылмышка шектелип Кара-Суу районунун тургуну 29 жаштагы Д.А. аттуу жаран кармалып, Кара-Суу райондук соту тарабынан 20 суткага тергөө абагына камакка алынган.
Тергөонүн жүрүшүндө 8 факты аныкталып, анда жалпы 8 жаранга 1 738 000 сом материалдык зыян келтирилген.
Териштирүү иштери улантылууда.
Ош ОИИБдин Басма сөз кызмат
