Курчап турган чөйрөнү коргоо жана токой чарбасы мамлекеттик агенттиги экологиялык экспертизаларга оң корутунду бергендиги үчүн курулуш компнаниялардан пара алып турганы аныкталды. Бул тууралуу УКМКнын басма сөз кызматы билдирди.
Маалыматка ылайык, сый акы социалдык жана соода объектилерин курууда жүргүзүлгөн.
Ошентип, аталган бөлүмдүн жооптуу кызматкерлери мыйзамсыз баюу максатында, уруксат кагаздарын жана лицензияларды алууда жасалма жол менен тоскоолдуктарды жаратуучу механизмдерди киргизип, коммерциялык уюмдардын өкүлдөрүн 500дөн 5000 долларга чейин пара берүүгө аргасыз кылышкан.
«2021-жылдын 14-январында, көрүлгөн чаралардын натыйжасында, кезектеги акчалай сыйлыкты алган соң аталган мамлекеттик мекеменин ага инспектору пара менен кармалды. Учурда башка чиновниктердин катыштыгы бар экени аныкталууда», — деп берилет маалыматта.
