Өзбекстандан Чоң-Гара жана Таш-Төбө айылдарын расмий өткөрүп алуу иштери башталды. Бул тууралуу президенттин Баткен облусундагы өкүлчүлүгү маалымат таратты.
Билдирүүгө ылайык, эки мамлекеттин чек арасын демаркациялоо боюнча жетишилген макулдашуулардын алкагында жер аянттарын алмашууга байланышкан уюштуруучулук-техникалык иштер башталган. Анын алкагында эки өлкөнүн биргелешкен жумушчу комиссиясы иш алып барууда.
Учурда айылдарда каттоо иштери жүргүзүлүп жатат. Кийинки этапта жашоочуларга Кыргызстандын жарандыгын берүү боюнча тиешелүү мыйзамдарда каралган жол-жоболор ишке ашырылат.
Белгилей кетсек, мамлекеттик чек араны демаркациялоо иштеринин жүрүшүндө мурда Өзбекстандын Фергана облусуна караштуу болгон Чоң-Гара жана Таш-Төбө айылдары Кыргызстанга өткөрүлгөн. Бул айылдарда негизинен этникалык кыргыздар жашайт. Аталган эки айылдын ордуна кыргыз тарап Өзбекстанган мамлекеттик чек ара тилкесинен эквиваленттүү (теңме-тең) жер аянтын өткөрүп берүүнү макулдашкан.
