Бишкектеги жогорку класстын окуучулары көрүүсү начар жана көрбөгөн адамдар үчүн EyeSens аттуу «акылдуу» көз айнек иштеп чыгышты. Долбоор Борбордук Азиядагы Америка университетинин TIFE программасынын алкагында даярдалып, Жогорку Кеңештин депутаты Дастан Бекешевге тааныштырылды.
Иштелме күнүмдүк колдонулган ак таякчалар толук чече албаган көйгөйлөрдү эске алуу менен түзүлгөн. Көз айнекке орнотулган камера айлана-чөйрөдөгү маалыматты смартфонго өткөрүп, жасалма интеллект аркылуу иштетет. Үн ассистенти колдонуучуга керектүү маалыматты жеткирип, башкаруу үн буйруктары менен жүргүзүлөт.
Учурдагы прототип объекттерди таануу, айлана-чөйрөнү сүрөттөө жана орус, англис тилдериндеги тексттерди окуу мүмкүнчүлүгүнө ээ. Айрым функциялары интернетсиз да иштейт.
Иштеп чыгуучулардын айтымында, EyeSens чет өлкөлүк аналогдорго салыштырмалуу кошумча жабдууларды талап кылбайт жана баасы жеткиликтүү.
Долбоордун авторлору- Байаман Ажимырзаев, Канат Тынчтыкбеков, Аманат Эрмаматов жана Султанмурат Эркинбеков. Команданын куратору — Ботокөз Сооронбаева.
