Кыргызстанда тарыхый-маданий имараттарды бузууга жана аларды мамлекеттик коргоодогу объектилердин тизмесинен чыгарууга тыюу салуу сунушталууда. Тиешелүү мыйзам долбоорун Маданият министрлиги иштеп чыгып, коомдук талкууга чыгарды.
Министрликтин маалыматына караганда, акыркы жылдары «тарыхый баалуулугун жоготту» же «авариялык абалда» деген жүйө менен тарыхый-маданий мурас катары катталган имараттарды бузуп, алардын ордуна коммерциялык объектилерди куруу учурлары көбөйгөн.
Ушуга байланыштуу мыйзам долбоорунда мындай имараттарды 10 жыл бою бузууга жана кандай гана негиз болбосун аларды Кыргызстандын тарыхый жана маданий эстеликтеринин мамлекеттик тизмесинен чыгарууга тыюу салуу сунушталууда.
Долбоорго ылайык, бул мөөнөт ичинде мамлекеттик органдар тарыхый объектилерди толук инвентаризациялап, алардын коргоо зоналарынын чектерин аныкташат. Мындан тышкары, тарыхый-маданий мурастарды сактоо, калыбына келтирүү жана коргоо боюнча мамлекеттик саясатты өркүндөтүү чаралары көрүлөт.
