Бишкектеги «Мадина» базарынын ондогон соодагерлери базарды жабуу жана жаңы соода борборуна көчүрүү чечимине каршы нааразылык акциясын өткөрүштү.
Соодагерлердин айтымында, сунушталган жаңы жай соода жүргүзүүгө толук ылайыкташкан эмес. Алар ошондой эле соода орундарынын баасы кымбат экенин жана айрымдары учурдагы контейнерлерин насыяга сатып алышканын белгилешүүдө.
Буга чейин шаар бийлиги «Мадина» базарын 1-августтан тарта жабууну пландап жатканын билдирип, соодагерлерге анын жанында жайгашкан жаңы соода борборуна көчүүнү сунуштаган.
Өз кезегинде Бишкек шаарынын мэри Айбек Жунушалиев бул маселени ар тараптуу карап чыгуу үчүн атайын комиссия түзүлөрүн билдирген.
Ал эми нааразы болгон соодагерлер алардын кызыкчылыгы эске алынып, жаңы соода жайына көчүрүү шарттары кайрадан каралышын талап кылышууда.
