Москванын чыгышында жайгашкан Некрасовка курулуш аянтынын жанында массалык мушташ уюштурган он адам кармалды. Бул тууралуу Ички иштер министрлигинин Москва департаментинин басма сөз кызматына шилтеме берип “РИА Нововсти” маалымат булагы кабарлайт.
Маалыматка ылайык, окуя Маресьев көчөсүндө болгон. Мушташтын бардык катышуучулары полиция бөлүмүнө жеткирилген, текшерүүдөн соң алардын ичинен 10 мигрантка майда бейбаштык үчүн 500дөн миң рублга чейин айып салынган.
Акыркы убактарда Москвага КМШ өлкөлөрүнөн келген мигранттардын катышуусу менен массалык мушташуу учурлары көпкатталууда. Кечээ жакында эле милиция кызматкерлери Бауманская көчөсүндөгү мушташка катышкан 50дөй жаранды кармаган. Алардын 19у Кыргызстандын жарандары экени маалым болду.
Өткөн аптада баш калаадагы мейманканалардын биринде кагылышуулар болуп, анда 20дан ашуун жаран кармалган. Ал эми июль айында Кузьминки метросунун жанындагы массалык мушташтан Орто Азиядан келген 200дөй жаран ИИМге жеткирилген.