Нарын шаарынын мэри Жылдызбек Беккелдиев күз-кыш жылытуу мезгилине карата даярдык иштеринин жүрүшүн текшерди.
Мэриянын маалыматына ылайык, шаар башчысы жылуулук тутумдарын оңдоо, турак жайларды жылуулукка кошуу жана отканалардагы оңдоо иштеринен кабар алып, тиешелүү мекемелердин жетекчилери менен штабдык жыйын өткөрдү.
Жыйында калкты жана социалдык объектилерди көмүр менен өз убагында камсыздоо, отканаларды жана жылуулук түтүктөрүн оңдоону тездетүү, электр тармактарын жаңылоо, жаңы курулган турак жайлар менен социалдык объектилерди жылуулукка кошуу жана көмүр сатуу үчүн кошумча базаларды ачуу боюнча тапшырмалар берилди.
Мэр бардык иштерди белгиленген мөөнөттө жана сапаттуу аткарууну тиешелүү кызматтардан талап кылды.
