Буга чейин Нарын шаарында медайым кош бойлуу келинге шприцтерди алмаштырып, антисептик сайып алганы маалым болгон. Жолдошу 7-каналга келин төрөт үйүнө 39 жумалык кош бойлуу кезинде барганын, кесарево операциясы пландаштырылганын, 23-мартта медайым цефазолиндин ордуна хлоргексидин сайганын айткан. Келинге саат 12:30да кесарево операциясы жасалып, 3кг 500гр салмактагы дени сак кыз төрөлгөн.
Анын жолдошу менен байланышканыбызда, келиндин абалы жакшырганы маалым болду. Анын айтымында, дарыгерлер келинди жандандыруу бөлүмүнөн палатага которушкан. «Абалы жакшы, өз алдынча тамак ичип, сүйлөп, баланы эмизип калды. Дарыгерлер келинчегимди жакшы карап жатышат»,- деди жолдошу.
