Ош шаарында киши колдуу болгон адамдын сөөгү табылды. Бул тууралуу Ош ШИИБинин басма сөз кызматы билдирди.
Маалыматка ылайык, Ош шаарынын Күкүм-Бий көчөсүнөн бүгүн эртең менен денесинде жараты бар белгисиз жарандын сөөгү табылган. Жергиликтүү тургундар бүгүн саат 08:00дө шаардык милицияга окуя тууралуу кабарлашкан.
«Жаранды кароо учурунда анын денесинин ич бөлүгүндө бир нече учту нерсенин кирген белгилери бар экендиги аныкталды. Бул факт «адам өлтүрүү» белгилери менен Ош шаардык ички иштер башкармалыгынын Кылмыштарды жана жоруктарды каттоонун бирдиктүү реестрине катталып, шектүү изделүүдө. Маркум болжол менен 30-35 жашта, азиат улутуна түспөлдөшүп кетет. Үстүндө күрөӊ түстөгү свитер, көк түстөгү спорттук шым болгон. Кыска сакалчан», – деп айтылат маалыматта.
Учурда тиешелүү экспертизалар дайындалып, сотко чейинки өндүрүш иши башталды. Окуя боюнча кошумча маалымат берилет.
