Панфилов районунда 19 жаштагы баланы бычактап кеткен 3 жигит кармалды. Бул тууралуу Чүй ОИИБнин басма сөз кызматы билдирди.

Маалыматка ылайык, 2021-жылдын 30-июль күнү аймактык ооруканага эркек киши бычактан алган жаракатынан улам жаткырылгандыгы тууралуу маалымат келип түшкөн.

Панфилов РИИБдүн ыкчам тергөө тобу көрсөтүлгөн дарекке чыгышып, ооруканадагы жарандын өздүгү аныкталып, ал 2002-жылы туулган А.К. экендиги такталган.

Бул факты кылмыштардын жана жоруктардын бирдиктүү реестрине КРнын Жазык кодексинин 138-беренеси (Ден соолукка оор зыян келтирүү) боюнча катталып, сотко чейинки өндүрүш иштери башталган.

«Жүргүзүлгөн ыкчам издөө иш-чараларынын натыйжасында 2002-жылы туулган З.Б. жана Э.Б., 2004-жылы туулган К.А. аттулар кармалышып, тергөө кызматына өткөрүлүп берилген. Териштирүү учурунда ичимдик ичип отурушкан эки топтогу балдардын ортосунда пикир келишпестик чыгып, уруша кетишип А.К. аттуу жаран бычактан жаракат алганы маалым болгон. Учурда ыкчам тергөө иш-амалдары жүргүзүлүп, зарыл болгон экспертизалар дайындалды», — деп берилет маалыматта.