Президенттин фотографы Султан Досалиев өлкө башчы Садыр Жапаровдун Монголиядагы иш сапары учурунда кызыктуу, унутулгус окуяга күбө болгонун жазды. Ал социалдык тармактагы баракчасына Монголиянын президенти менен түшкөн сүрөтүн жүктөп, төмөндөгүлөрдү билдирди.
«Бул иш-чараны уюштурууга жана чагылдырууга катышкандардын баары үч күн бою чыңалган режимде күнү-түнү иштешти. Пландаштырылган иш-чаралар аяктагандан соң Монголиянын президенти мамлекет башчыбызды узатты. Ошол убакытта кичине тыным болуп калды. Ошондо Монголиянын президенти мени байкап калып “Фотографтар дайыма сүрөтсүз калышат” деп, күтүүсүз жерден чогуу сүрөткө түшүүгө чакырды. Өлкө президентеринин мени менен биринчи жолу сүрөткө түшкөнү болду. Бул жөнөкөй нерсе менен ал дароо үч жумушчу күндөгү чарчоону басты. Ушундай жагымдуу билдирүү менен менин мамлекеттик сапарды чагылдыруу боюнча жөнөкөй миссиям аяктады», — деп жазды Досалиев.
Белгилей кетсек, 11-июль күнү кечинде президент Садыр Жапаровдун Монголияга болгон мамлекеттик сапары аяктап, Бишкекке кайтып келген.
