Бажы кызматынын төрагасынын мурдагы орун басары Райымбек Матраимов 9-декабрга карата экономикалык мунапыстын алкагында Финансы министрлигинде ачылган депозиттик эсепке жалпы 807,3 млн сом которду. Бул тууралуу «Кабар» агенттигине аталган министрликтен кабарлашкан.
Маалыматка ылайык, ушул жылдын 21-октябрында Садыр Жапаров президенттин милдетин аткарып турганда Кыргызстанда 30 күндүк экономикалык мунапыс жарыялаган.Анын алкагында депозиттик эсепке ачылган. Учурда ал эсепке жалпы 912,1 млн сом түшкөнү кабарланды. 8-декабрга карата 773,4 млн сом Матраимов тарабынан которулган. Райымбек Матраимов УКМКнын Коррупцияга каршы күрөшүү кызматы тарабынан 20-октябрда кармалган. Ага 2016-жылдан бери бажы тармагында коррупциялык схема уюштурган деп айып тагылууда. Матраимов коррупциялык иштерин мойнуна алып, мамлекеттик казынага 2 млрд сом сом төлөп берерин билдирген. Анын 80 млн сомун алдын ала которгону айтылган.
