Президент Садыр Жапаров бүгүн, 29-ноябрда, Ынтымак ордодо Саха (Якутия) Республикасынын Башчысы Айсен Николаев менен жолугушту.
Президент Садыр Жапаров Кыргызстан менен Якутиянын ортосундагы мамилелерди чыңдоо үчүн сапардын маанилүүлүгүн, жалпы маданий жана тарыхый байланыштарды, ошондой эле Россия менен стратегиялык өнөктөштүктү белгиледи.
Ал Саха Республикасынын опера жана балет театрынын гастролдору жана хапсагай боюнча дүйнө чемпионаты сыяктуу маданий жана спорттук иш-чаралардын ийгилигин баса белгилеп, мас-рестлинг боюнча алдыдагы чемпионатка үмүт артарын билдирди.
Садыр Жапаров соода-экономикалык өз ара аракеттенүүнү өнүктүрүүгө, инвестицияларды тартууга жана биргелешкен ишканаларды түзүүгө өзгөчө көңүл бурду. Буга байланыштуу ал бизнес-миссиялар менен алмашууну жөнгө салууну сунуштады жана ошондой эле эки тараптын туристтик потенциалын белгиледи.
Садыр Жапаров Бишкекте эстелик түрүндө түбөлүккө калтырылган Максим Аммосовдун инсан катары маанилүүлүгүн баса белгилеп, Якутияда Чыңгыз Айтматовдун мурасын урматтагандыгы үчүн ыраазычылык билдирди. Ал 2025-жылы Кыргызстанда Якутия Маданият күндөрүн өткөрүү пландарын белгилеп, алардын жогорку деңгээлде өтөөрүнө ишенимин билдирди.
Өз кезегинде Саха Республикасынын Башчысы Айсен Николаев боордош Кыргызстан жерине биринчи жолу келгенин белгилеп, Кыргызстандын Президентин жылуу кабыл алгандыгы жана меймандостугу үчүн чын жүрөктөн ыраазычылык билдирди. Ал Якутия Кыргызстан менен кызматташууну өнүктүрүү үчүн мүмкүнчүлүктөрдү жогору баалаарын баса белгиледи.
Айсен Николаев региондор ортосунда товар жүгүртүү өсүп жатканын белгилеп, Якутиянын жетекчилиги бизнес жана ишканаларга кыргыз тарап менен тыгыз байланыш түзүүгө активдүү көмөк көрсөтүүнү көздөп жатканын айтты. Жолугушуунун алкагында Айсен Николаев 2026-жылы Кыргызстанда «Азия балдары» көчө оюндарын өткөрүүнү сунуштап, бул иш-чара достуктун символу болуп, спорттук өз ара аракеттенүүнүн өнүгүшүнө чоң салым кошоорун баса белгиледи.
Жыйынтыгында тараптар кызматташтыкты бекемдөө боюнча демилгелерди колдоого даяр экендигин айтышты.
