Жогорку Кеңештин депутаты Мирлан Самыйкожо анын ордуна башка депутат желекти өзгөртүүгө “макул” деп добуш берип койгонун айтты.
Ал муну ким жасаса да жооп бериши керектигин билдирди.
“Эл менен жолугуп жүргөндө, бул маселе жашыруун түрдө Жогорку Кеңештин кароосуна киргизилип, жасалма жол менен өткөрүп койдуңар. Менин компьютеримен «макул» дегенди басып койдуңар. Ким басса да жооп бериши керек. Мен тууну өзгөртүүгө караманча каршымын. Кечээ да комитетке туунун авторлорун алып келген жоксуңар. Муну да алешемдик менен алдамчылык жол менен өткөрүп алдык. Элдин 90 пайызы каршы деп турат. Референдум болушу керек болчу. Мен көпчүлүктү урматтайм, сыйлайм. Бирок элди укпай койдук” — деди ал.
