Жалал-Абаддын Сузак районунда Hyundai Porter жүк ташуучу унаасы 29 баланы сүзүп кетти.
Маалыматка ылайык, окуя бүгүн, 2-майда Жерге-Тал айылында уюштурулган маданий иш-чара учурунда болгон.
Алдан ала маалымат боюнча, окуучулар «Манас» айтып жатканда, дөңгө токтотулган Porter жүрүп кетип, балдарды сүзгөн. Унаанын ичинде айдоочу болгон эмес.
Саламаттык сактоо министрлиги кырсыкта 9-16 жаштагы балдар жабыркаганын билдирди.
Учурда 18 бала ооруканага жаткырылган, калган 11 окуучуга жеринде жардам көрсөтүлүп, амбулатордук дарыланууга жөнөтүлгөн.
«Ооруканадагы 18 баланын жетөө реанимацияда жатат, алардын үчөөнүн абалы оор. Дагы сегизөөнүн абалы орто оор»,-деп берилет маалыматта.
