Түз эфир учурунда плакат көтөрүп чыккан редактор 14 саат сурак берди. Бул тууралуу ал сурактан чыккан соң журналисттерге билдирди.
«Мен колдогонуңуздар үчүн ыраазычылык билдирем. Бул күндөр менин жашоомдогу эң оор күндөрдөн болду. Анткени мен эки сутка уктабай, 14 саат сурак бердим. Мага жакындарым менен байланышууга мүмкүнчүлүк беришкен жок. Юридикалык да жардам берилген жок. Мен толугу менен эртең айтайын, кичине эс алышым керек»,- деди ал.
Москванын Останкино сотунун чыгарган чечими боюнча Марина Овсянникова 30 миң рубль айып төлөмөй болду. 14-мартта Орусиянын Биринчи каналынын кызматкери, редактор Марина Овсянникова «Время» берүүсүнүн эфиринде согушту токтотууга чакырган плакат көтөрүп чыккан. Кийинчерээк анын дайынсыз болуп жатканы маалымдалган болчу.
