Афганстандан качып чыгып, Тажикстандын аймагында кармалып турган памирлик кыргыздар кайра Афганстанга өткөрүлүп берилди. Бул тууралуу Тажикстандын УКМКсына таянып, тажик басылмалары жазып чыкты.
Маалыматка ылайык, Кичи Памирден мал кели менен качып чыккан 345 жаран 17-18- июль күндөрү артка кайтарылган.
«БУУнун «Качкындардын статусу жөнүндө» конвенциясына ылайык, Мургаб районунун Чоштепп жана Дуйтук участогуна келген ооган качкындары Тажикстандын тиешелүү органдары тарабынан убактылуу жашай турган жер, тамак-аш, кийим-кече жана медициналык кызмат менен камсыз болушкан», — деп билдирген коңшу өллкөнүн УКМКсы.
Эске салсак, бул аралыкта Кыргыз бийлиги Памирлик боордошторду өлкөгө кабыл алууга даяр экендигин жар салган болчу. Министрлер кабинети тарабынан Тышкы иштер министрлигине боордошторду алып келүү маселесин Тажикстан менен сүйлөшүү тапшырмасы берилген.
