«Центерра» компаниясы Кумтөр алтын кениндеги борбордук карьерде топтолгон суунун деңгээли кендин өзүнө жана анда иштеген жумушчуларга «катастрофалык кесепет алып келиши ыктымал» деген кооптонуусун билдирди.
Маалыматка ылайык борбордук карьердеги суу кеминде 40 метр, ишкананын 25 жылдык тарыхында эч качан мындай болбогону, маселени тез арада чечүү керектиги айтылды. Билдирүүгө социалдык түйүндөрдөн алынды деген сүрөт жана видео тиркелди.
«Карьерге суу толуп, четтеринен өтө көп суу агып жатат» деп айтылат «Центерранын» билдирүүсүндө.
«Кумтөрдүн» тышкы башкаруучусу Тенгиз Бөлтүрүк «Центерранын» бул билдирүүсүн калп деп атоодо. 1-сентябрда ал «Азаттыкка» төмөнкүлөрдү билдирди.
«Бул накта калп. Каалаганын жазып жатышат. «Центерра» өтө көп басылмаларга акча төлөп койгон. Суу каптады дегени эмнеси? Августтун планын аткардык. Паровоздой иштеп жатабыз. Мындай ушак сөздөргө убактымды да короткум келбейт» дейт Болтурук.