Кечээ, 21-августта улакчылар Ош облустук башкармалыктын алдына чогулуп, байгенин суммасы айтылгандан эки эсе аз чыгып калгандыгына нааразы болушту.

Буга чейин уюштуруучулар тарабынан улакчыларга көк бөрү боюнча мелешке жалпы фонддон 500 миң сом каралганы, 1-орунга 250 миң сом, 2-орунга 150 миң сом, 3-орунга 100 миң сом берилет деп айтылган. Бирок 1-орунга 90 миң сом, 2-орунга 63 миң сом, 3-орунга 20 миң сом берилген.

Ал эми министрлер кабинетинин төрагасы Улукбек Марипов бүгүн жеңүүчүлөргө 100 миң сом, президенттин Оштогу өкүлү Зиядин Жамалдинов 70 миң сом берген. Андан 1-орунга 40 миң сом, 2-орунга 30 миң сом, 3-орунга 20 миң сом эле берилип, улакчылардын нааразычылыктарын жаратышкан.

Улакчылардын айтымында, алар атайын аттарды Таластан, Токтогулдан жалдап алып келип, 1 айдан бери даярданышкан.

Облус жетекчилиги Зиядин Жамалдинов нааразы болгон улакчыларды кабыл алып, каражатты бөлүштүрүү көк бөрү федерациясына милдеттендирилгенин, уюштуруу ишинде кемчиликтер кеткендигин моюндаган. Ошону менен бирге, бүгүн, убадаланган калган каражаттар да ээсине кайтарылаарын убада кылган.