Социалдык тармактарда тараган Ысык-Ата районунун Нурманбетов айыл аймагындагы мыйзамсыз таштанды төгүлгөнү тууралуу маалыматтан кийин текшерүү жүргүзүлдү. Бул тууралуу Жаратылыш ресурстары, экология жана техникалык көзөмөл министрлиги билдирди.
Маалыматка ылайык, Экологиялык жана техникалык көзөмөл кызматынын Чүй регионалдык башкармалыгынын инспекторлору жеринде иликтөө жүргүзүшкөн.
Текшерүүнүн жыйынтыгында мыйзам бузуу фактысы аныкталып, Нурманбет айыл өкмөтүнө протокол түзүлүп, 17 миң сом өлчөмүндө айып пул салынды.
Учурда аталган аймакты таштандылардан тазалоо иштери «Нурманбет-Биримдик» муниципалдык ишканасы тарабынан жүргүзүлүүдө.
Министрлик жарандарды жаратылышка аяр мамиле кылууга жана экологиялык талаптарды так сактоого чакырды.
