Жогорку Кеңештин депутаты Жанар Акаев, кече 19-март «Дордой моторс» логистикалык борборуна барып, жүк ташуучу унаалардын айдоочулары менен жолуккан.
Натыйжада, биринчи премьер-министр Артём Новиковко кайрылуу жолдоп, коңшу өлкөгө жер-жемиш, жашылча ташып жаткан айдоочулардын ПЦР тест тапшыруу төлөмүн 50%га арзандатып берүүнү сунуштады.
“Урматтуу Артём Эдуардович Новиков мырза, COVID 19 менен күрөшүү штабынын башчысы катары сизге кайрылып жатам. Казакстанга жер-жемиш, товар ташыган оор жүк ташуучу автоунаалардын айдоочулары менен атайын барып жолуктум, суранычын уктум, алар ар үч күн сайын ПЦР тесттин аныктамасы менен чек арадан өтүшөт. Бул албетте, коопсуздук үчүн Казакстандын да талабы. Бирок тынбай кошуна өлкөгө каттаган айдоочулар, ар үч күн сайын ПЦР анализ тапшырып, тапкан акчасынын көпчүлүк бөлүгү ПЦРге короп жатат. Ар үч күн сайын 1500 сомдон ашуун мам.лабораторияга, жеке менчикке барса 2000 сомдон ашуун коротуп жатышат. Казакстанга тынбай кирип чыккан айдоочуларга, мамлекеттик лабораториялардан жок дегенде 50% жеңилдик карап берсеңиздер деген сунуш. Сиз саламаттыкты сактоо министрлигине тапшырма берип, маселени тез арада чечесиз деп ишенем”-деп жазылган.
