Транспорт жана коммуникациялар министрлиги 1-июндан 1-сентябрга чейин максималдуу жалпы салмагы 18 тоннадан ашкан жүк ташуучу унаалардын кыймылына убактылуу чектөө киргизди. Бул тууралуу аталган министрлик билдирди.
Маалым болгондой, чечим жай мезгилинде жалпы пайдалануудагы автомобиль жолдорунун сакталышын камсыз кылуу жана алардын кызмат мөөнөтүн узартуу максатында кабыл алынган.
Ага ылайык, күндүз абанын температурасы 28°C жана андан жогору болгондо саат 10:00дөн 20:00гө чейин жүк ташуучу унаалардын жолдордо жүрүүсүнө тыюу салынат. Чектөө жүргүнчү ташуучу транспортко, гуманитардык жардамга, тез бузулуучу азыктарды жана кооптуу жүктөрдү ташыган унааларга, ошондой эле атайын уруксаты бар ири көлөмдүү жүктөргө жайылтылбайт.
Көзөмөлдү Жерде жүрүүчү жана суу транспорту департаментинин көчмө топтору транспорттук көзөмөл пункттарында жүргүзөт.
