Курулуш, архитектура жана турак жай-коммуналдык чарба министрлиги өлкө боюнча 500дөн ашык социалдык жана инфраструктуралык объекттин курулушун жүргүзүп жатат.
Министрликтин маалыматына ылайык, 2025-жылы «Кыргызстан аэропорттору» ААК менен биргеликте 50 жылдан ашык тарыхы бар «Манас» эл аралык аэропортун реконструкциялоо башталган. Долбоорду министрлик иштеп чыгып, учурда курулуш иштеринин 90 пайызы аяктады.
Акыркы жылдары Курулуш министрлиги өлкө аймагында социалдык объектилерди куруу менен катар, ири инфраструктуралык долбоорлорду ишке ашыруу, объектилерди реконструкциялоо жана капиталдык оңдоо багытында масштабдуу иштерди жүргүзүүдө.
Алардын катарында «Ала-Тоо Резорт» тоо-лыжа комплекси, Таластагы «Баластан» балдар оюн-зоок борбору, «Манас Ордо» улуттук комплекси, «Чыңгыз Айтматов Ааламы» тарыхый-маданий комплекси жана «Манас-2» эл аралык аэропортунун жаңы терминалы бар.
Министрлик белгилегендей, бул объектилердин бир бөлүгү 2026-жылы Кыргызстандын Эгемендүүлүк күнүнө карата пайдаланууга берилет.
