Бишкекте мурунку аялы Жибек Урустемованы атып өлтүргөн Бакыт Урустемов өмүр бою эркинен ажыратылды. Бул тууралуу шаардык соттун маалымат кызматынан кабарлады.
Маалыматка ылайык, Свердлов райондук соту 10-июлда айыпкерди «Өзгөчө мыкаачылык менен адам өлтүрүү» жана «Кыйноо» беренелери боюнча күнөөлүү деп тапкан. Анын мүлкү конфискацияланып, жабырланган тарапка 1 миллион сом кенемте төлөмөй болду.
Эске салсак, былтыр 23-декабрда 47 жаштагы Жибек Урустемова туулган күнүндө калаадагы батиринде мурдагы күйөөсүнүн колунан каза тапкан. Ошол күнү жубайлардын ажырашууга байланыштуу соту өткөнү, күйөөсү отурумда ажырашпай турганын айтканы белгилүү болгон.
