Баткен облусуна караштуу Кадамжай районунда тойдон адамдар массалык түрдө ууланды. Бул тууралуу Cаламаттык сактоо министрлигинен билдиришти.
«250 адам катышкан той кечээ күнү өткөн. Бүгүн саат 19:30га карата уулангандардын саны 58 адамга жеткен. Алардын ичинен төрт аял жана эки бала (6-2 жашта) ооруканага түшкөн. Балдар Кадамжайдагы оорукананын реанимация бөлүмүндө жатат. Абалдары орточо оор»,-деп айтылат маалыматта.
Алдын ала маалымат боюнча, 30-июлда тойканада 250 адамдын катышуусунда үй-бүлөлүк маараке өткөн.
Белгиленгендей, алгачкы жабырлануучулар 31-июлда саат 18:30дарда Кадамжай райондук жалпы дарыгердик практика борборуна кусуу, дене табынын 38-39га чейин көтөрүлүшү, алсыздык, ич өтүү симптомдору менен кайрылышкан (48 адам).
Тактоо учурунда жабырлануучулар этте, майонез кошулган салатта, тоок этинде жыт болгонун белгилешкен.
Учурда кафеге санитардык-эпидемиологиялык текшерүү иштери жүргүзүлүп, жабыркагандардын тизмеси такталууда.
