“Алтын балалык” балдарды реабилитациялоо борбору 21- июндан баштап миграцияда жүргөн кыргыз жарандарынын балдарын тосуп ала баштады. Биринчилерден болуп Казакстанда эмгектенген кыргыз жарандарынан 60 бала эс алууга келди.
«Биз тосуп алган балдарга кыргыз тилинде сүйлөөгө басым жасап жатабыз. Атайын кыргыз тилинде сабак берген мугалимдерди алдык. Учурда Россиядагы мигранттардын балдарын тосуп алганга даярданып жатабыз. Ошондой эле өлкөбүздүн ар бир облусундагы 500дөй жетим балдардын тизмесин алып, аларды да тосуп ала баштадык. Биздин балдар менен миграциядан келген балдарга бирдей программа менен сабак өтүлөт. Мындай жол менен алар кыргыз тилин жакшы деңгээлде үйрөнөт деген ойдобуз”,-деди борбордун жетекчиси Алымкадыр Бейшеналиев.
