Ат-Башы райондук мамлекеттик администрациясы социалдык тармактарда тараган мыйзамсыз балык уулоо тууралуу видеого байланыштуу түшүндүрмө берди.
Эске салсак, кечээ Арпа жайлоосунда чет өлкөнүн жарандары мыйзамсыз балык уулап жатканы боюнча видео тарап, жергиликтүү тургундар бийликке кайрылган.
Райондук милиция алардын ким экенин аныктап, Ат-Башы РИИБдин тергөө кызматына жеткиришкенин облустук ИИБ кабарлады.
Маалыматка ылайык, чет элдиктер автоунаасынын капталындагы жазууларды сыйрып, мамлекеттик номерин алып коюшкан. Унаа айып короого киргизилип, териштирүү жүрүп жатат.
