Өлкөбүздө 35 мамлекеттик дарыкана ачылат. Бул тууралуу бүгүн, 6-октябрда саламаттык сактоо министри Алымкадыр Бейшеналиев билдирди.
“Бир-эки ай ичинде 35 дарыкананын имараты даяр болот. Азыр биздин адистер элге керектүү дары-дармектин тизмесин даярдап, аны кайсы жактан алууну тактап жатат. «Кыргызфармация” мамлекеттик ишканасы аркылуу дары өндүрүүчүлөрдөн дары сатып алынып, арзан жана жогорку сапатта элге жеткиликтүү болот”, — деди Бейшеналиев.
Министр өз сөзүндө, Кыргызстанда дары-дармектин 700 түрү чыгарын жана өлкө боюнча 34 завод иштеп жатканын айтып өттү.
Эскерте кетсек, Жогорку Кеңеште 6-октябрда “Медициналык буюмдарды жүгүртүү жөнүндө” жана “Дары каражаттарын жүгүртүү жөнүндө” мыйзам долбоору боюнча коомдук угуу өттү.
