Бүгүн, 15-ноябрь күнү, Бишкек шаарындагы Дөлөн Өмүрзаков атындагы стадиондо ден соолугунан мүмкүнчүлүгү чектелген жарандар үчүн «Чектөөсүз спорт» пара марафону өткөрүлдү.
Бул иш-чара Кыргызстандын Олимпиадалык түрлөрү боюнча дирекциясы, Кыргызстан улуттук паралимпиадалык комитети, жеңил атлетика федерациясы жана дүйнөлүк марафон дирекциясы тарабынан уюштурулду.
Марафондун негизги максаты — сергек жашоо образын жайылтуу, коомчулукту спортко активдүү катышууга чакыруу жана эл аралык спорттук байланыштарды чыңдоо. Ошондой эле, бул иш-чара инклюзивдүү спортту колдоого багытталып, ден соолугунун мүмкүнчүлүктөрү чектелген адамдар үчүн физикалык мүмкүнчүлүктөрүнө карабастан, спорттук атаандаштыкта бирдей шарттарды түзүүнү көздөйт.
Пара марафондо спортчулар жеңил атлетика, мас-рестлинг, пара армрестлинг, шахмат жана жаа атуу сыяктуу спорт түрлөрү боюнча мелдешишти.
Иш-чарага өлкөнүн ар кайсы аймактарынан келген спорт сүйүүчүлөр өз күчүн сынашты. Катышкан бардык спортчуларга сыйлыктар тапшырылды.
