Министрлер кабинети Бишкектеги дагы эки объектини республикалык маанидеги тарых жана маданият эстеликтеринин мамлекеттик тизмесинен чыгарды. Алар Москва жана Тоголок Молдо көчөлөрүнүн кесилишиндеги Республикалык көз клиникасынын имараты, ошондой эле Ахунбаев көчөсү 90 дарегинде жайгашкан Туберкулез институту.
Тийиштүү токтомго Минкабдын башчысы Адылбек Касымалиев 3-июлда кол койгон. Документ расмий жарыялангандан 10 күн өткөндөн кийин күчүнө кирет.
Эки имарат тең борбор калаанын медициналык инфраструктурасынын тарыхы менен байланыштуу. Көз клиникасы 1939-жылы курулуп, шаардагы алгачкы адистештирилген медициналык мекемелердин бири болгон. Ал эми Туберкулез институтунун имараты 1949-жылы тургузулган. Ондогон жылдар бою алар Бишкектин архитектуралык көрүнүшүнүн бир бөлүгү болуп, тарых жана маданият эстеликтери макамына ээ болуп келишкен.
Буга чейин минкаб Чыңгыз Айтматов проспектиси 95 дарегиндеги «Кыргызстан Аба Жолдору» авиакомпаниясынын имаратын (мурдагы «Аэрофлот» агенттиги), ошондой эле Тоголок Молдо жана Киев көчөлөрүнүн кесилишинде жайгашкан, 1980-жылдары курулган жайкы аянтчасы бар улуттук кафенин имаратын да эстеликтердин тизмесинен чыгарган.
