Чек арадан мыйзамсыз жүк алып өтүүгө аракет кылган аткезчилердин ишине бөгөт коюлду. Бул тууралуу Чек ара кызматынан билдиришти.
Билдирүүгө ылайык, Лейлек районуна караштуу Маргун-Арка автоунаа жолунда кызмат өтөө учурунда Кыргызстандын 1991-жылы туулган Р.С. аттуу жарандын башкаруусунда Мерседес-Бенц Спринтер үлгүсүндөгү автоунаасы токтотулган. Бирок айдоочу чек ара кызматынын мыйзамдуу талаптарына баш ийбей чоң ылдамдыкта аскер кызматкерлеринин жанынан айдап өтүп кеткен.
Ал эми чек ара кызматы асманга эскертүү иретинде ок чыгарып, аргасыздан автоунааны токтотуу үчүн дөңгөлөгүн көздөй ок чыгарган.
Транспорт каражатын текшерүү учурунда 1000 кг ашуун конфеттер аныкталып, айдоочуда жүккө тиешелүү документтер болгон эмес. Айдоочу бул жүктөрдү Кыргызстандан Тажикстанга алып өтүүгө аракет кылган.
Тиешелүү иш-кагаздары толтурулгандан соң, кармалган айдоочу жана жүк мындан ары териштирүү иштерин жүргүзүү үчүн компетентүү органдын кызматкерлерине өткөрүлүп берилди.