Өзгөчө ири өлчөмдө пара талап кылган Бишкек шаарынын Свердлов райондук сотунун судьясы кармалды. Бул тууралуу УКМКдан билдирди.

20-мартта Башкы прокуратура тарабынан козголгон кылмыш иши боюнча Бишкек шаарынын Свердлов райондук сотунун судьясы К.А.К. жана ортомчу болуп иштеген адвокат Г.М.В. өзгөчө ири өлчөмдө, тактап айтканда 12 миң АКШ долларын опузалап пара талап кылгандыгы аныкталган.

Тергөөнүн жүрүшүндө судья жактоочу менен жашыруун сүйлөшүү жүргүзүү максатында, видеокөзөмөл камералары жок болгон жерлерде, тагыраагы өзүнүн дааратканасында жолугушууларды өткөргөндүгү, ал жерде соттук актыларды алардын пайдасына оң чыгаргандыгы үчүн айрым айыпталуучулардан алган акчалай сый акыларын өз ара бөлүштүргөндүгү такталган.

21-мартта аталган судья Бишкек шаарынын Биринчи май райондук сотунун токтому менен 20-майга чейин УКМКнын тергөө абагына киргизилди.

Учурда УКМК Жогорку сотунун жетекчилиги менен биргеликте сот бийлигиндеги коррупциялык көрүнүштөрдү жоюу боюнча тиешелүү иштерди жүргүзүүдө.