Сокулук районунун Кызыл-Туу айылынын тургундары 16 жаштагы өспүрүмдү сабап, зордуктаган шектүүнүн үй-бүлөсүнө көчүп кетүү талабын коюшууда. Бул тууралуу бүгүн, 7-декабрда аксакалдар сотуна чогулган эл билдиришти.
Алардын айтымдарында, шектүү жазасын алып, кийинки муунга дагы сабак болушу керек. Ал эми аксакалдар соту элди тынчтанууга үндөшүп, бүгүн бир бүтүмгө келишерин убадалашты.
Эске сала кетсек, 5-декабрда өспүмүрдүн атасы милиция кызматкерлерине кайрылып, кызынын аёосуз зордукталгандыгы тууралуу айткан. Ал эми шектүү кечээ, 6-декабрда кармалып, убактылуу кармоочу жайга киргизилип, тергөөгө алынган.
Ал эми Исмаил айылынын 50гө жайын тургуну бул окуядан соң Сокулук РИИБнүн имаратына митингге чыгышып, шектүүнү берүүнү талап кылышкан. Алар менен Сокулук РИИБнин жетекчилиги жолугуп, жогорудагы кылмыш иши боюнча түшүндүрмө берип, ал иш көзөмөлдө турганын айтып, мыйзам чегинде тергөө иштери жүргүзүлөрүн билдирген соң, чогулгандар таркап кетишкен.