Казакстандын он облусунда суу ташкыны болду. Миңдеген тургундар эвакуацияланып, өзгөчө кырдаал жарыяланды. Кээ бир облустарда абал оор. Жүздөгөн үйдү, короо-жайды суу каптап, мал-жандыктар кырылган.
“7 783 адам эвакуцияланып, анын 2800ү балдар. Убактылуу жайгаштыруу пунктуларына 3 131 киши жеткирилген. Куткаруу иштерине 6000 адам тартылган. Алар 3000 техника жана 12 тик учак менен иш алып барууда. Республикалык штаб суу каптаган Актөбө, Акмоло, Костанай, Батыш-Казакстан, Түндүк-Казакстан жана Павлодар облустарын көзөмөлгө алган”,- деп жазды Sputnik Казакстан өлкөнүн Өзгөчө кырдаалдар министрлигинин маалыматына таянып.
ӨКМ жана жергиликтүү аткаруу органдары суу ташкындаган аймактардан 3,5 миллион куб метр суу сордурган.
Эскерте кетсек, 28-мартта жаратылыш кырсыгына байланыштуу Костанай облусунун үч районуна, 29-мартта Абай облусундагы Аксаут районуна, Актөбө облусуна өзгөчө кырдаал киргизилген. Кийинчерээк мындай кырдаал Кылшакты дарыясындагы суунун деңгээли кескин көтөрүлгөндүгүнө байланыштуу Көкшөтоодо да кабыл алынган.
Казакстандын президенти Касым-Жомарт Токаев айрым региондордогу ташкынга байланыштуу 30-мартта ыкчам кеңешме өткөрдү. Анда жергиликтүү бийлик башчыларын, өкмөттү сынга алды. Ал Казакстан элинен кечирим сурап, бардык жабыркагандарга акчалай жардам убада кылган.
