Башкы прокурор Курманкул Зулушев менен ички иштер министри Улан Ниязбеков 6-июлдан аймактарды кыдырат. Маалыматты президенттин маалымат катчысы Эрбол Султанбаев билдирди.
Мамлекет башчы Садыр Жапаров өлкө аймактарына болгон жумушчу сапарында жер-жерлердеги жашоочулар менен жолугуп, алардын көпчүлүгү соттордун чечимдерине, укук коргоо органдарынын кызматкерлеринин иш-аракеттерине карата нааразылыктарды айтышкан.
Мындан улам президент башкы прокурор менен ички иштер министрин чыгып, элдин укук коргоо органдарынын ишмердүүлүгүнө байланышкан маселелеринен кабар алуу тапшырмасын койгон.
Зулушев менен Ниязбеков алгач Кыргызстандын түштүк аймагы Жалал-Абад, Ош, Баткен облустарына барышат. Андан кийин Талас, Чүй, Нарын, Ысык-Көл облустарын кыдырышат.