Өлкө жарандарына жогорку үстөк пайыз менен акча ссудаларын берүү жолу аркылуу кыймылсыз мүлктөрдү мыйзамсыз тартып алган адистешкен туруктуу кылмыштуу топ аныкталды. Бул тууралуу УКМКдан билдирди.
Маалыматка ылайык, О.Ж.К. жана Д.Д.Н. аттуу жарандардын жетекчилиги астындагы топ, тийиштүү уруксат берүүчү документтери жок туруп, өлкө жарандарына жогорулатылган үстөк пайыздары менен (жылына 60% дан 120%га чейин) оор шарттарда накталай кредиттерди берүү боюнча иш-чараларды уюштуруп, натыйжада карыз алуучулар кыймылсыз мүлктөрүн күрөөгө коюп, жыйынтыгында алардан ажырап калышкан.
22-февралда козголгон кылмыш ишинин алкагында шектүүлөр пара алып жаткан жеринен кармалып, Бишкек шаардык ИИБнин убактылуу кармоочу жайына киргизилди.
Учурда козголгон кылмыш ишинин алкагында аталган топтун мыйзамсыз аракеттеринен жапа чеккен башка жарандарды аныктоо боюнча тергөө-ыкчам иш-чаралары жүргүзүлүүдө.
