Кыргызстанга 1 миллион 400 миң сомдон ашык бааланган товарларды мыйзамсыз алып кирүү фактысы аныкталды. Бул тууралуу Мамлекеттик салык кызматы билдирди.
Маалыматка ылайык, рейддик иш-чаралардын жүрүшүндө Евразиялык экономикалык биримдикке (ЕАЭБ) мүчө мамлекеттердин биринен үй тиричилигине керектелүүчү товарларды ташып келе жаткан жүк ташуучу унаа текшерүүгө алынган.
Текшерүүнүн жыйынтыгында жүктүн арасында тиешелүү коштомо документтери жок жана салыктык эсепке алынбаган эл керектөөчү товарлар табылган. Алдын ала эсеп боюнча алардын жалпы наркы 1,4 миллион сомдон ашат.
Учурда аталган факты боюнча мамлекеттик бюджетке төлөнүүгө тийиш болгон салыктарды өндүрүү жана мыйзамда каралган тиешелүү чараларды көрүү боюнча иштер жүргүзүлүп жатат.
