Кыргызстандагы бардык мектептерде класстардын кеминде 50 пайызы кыргыз тилинде окутулушу зарыл. Бул тууралуу Агартуу министри Догдуркүл Кендирбаева журналисттердин суроолоруна жооп берип жатып билдирди.
Анын айтымында, кыргыз тилин билбеген жаран өлкөдө өзүн толук деңгээлде ишке ашырууда кыйынчылыкка туш болушу мүмкүн. Ошондуктан мамлекеттик тилди билүү милдеттүү болуп эсептелет, бирок бул башка тилдерди чектөөнү билдирбейт.
Министрлик учурда кыргыз тилин окутууну күчөтүү маселесин талкуулап, ар кандай сунуштарды анализдеп жатканын белгиледи.
Расмий маалыматтарга ылайык, Кыргызстанда мектептерде окутуу кыргыз, орус, өзбек, англис жана тажик тилдеринде жүргүзүлөт. Ошондой эле кыргыз-орус багытындагы кош тилдүү мектептер да бар.
Билим берүү министрлиги бул багыттагы акыркы чечимдер бардык сунуштардын талдоосунан кийин кабыл алынарын кошумчалады.
